Ribera defende la so xestión énte la dana, "siempres baxo'l mando únicu" de la Generalitat

Tol PP européu, menos la delegación española, acuerda sofitar a Ribera si da esplicaciones

La vicepresidenta tercera del Gobiernu, Teresa Ribera, responsabilizó esti miércoles a la Generalitat valenciana de la xestión de la dana, negó qu’hubiere apagón informativu de l’Aemet y la Confederación Hidrográfica del Júcar, y solliñó qu’estos organismos actuaron siempres baxo’l mandu únicu del Gobiernu autonómicu.

Na so comparecencia nel Congresu de los Diputaos pa dar cuenta de la xestión del so ministeriu nesti episodiu, consideró que l’Axencia Estatal de Meteoroloxía (Aemet) y la Confederación Hidrográfica del Júcar (CHJ) xeneraron "alertes y informaciones afayadices" al respective de la dana qu’arrasó Valencia operando "enantes, el día 29 y dempués" baxo’l mandu únicu de la Generalitat valenciana.

Ribera entamó la so intervención amosando les sos condolencies a les víctimes: "Dende’l dolor que siento, que sentimos toos", dixo, y facilitó una cronoloxía detallada de los fechos recordando que l’actuación sobre’l tarrén yera competencia de l’alministración autonómica.